Tuesday, February 28, 2012

كده وخلاص

قد ايه صعب تحس انك ضعيف .. مالكش وطن .. مالكش حضن حنين عليك .. مفيش حد يقف جمبك .. يحوش عنك .. يكلم بلسانك .. تتحامى فيه وتقوله انت سندي .. قد ايه صعب انك تحس انك مستنى دا ..والاكتر انك بدأت تشحته من الناس .. والناس بتهشك بعيد .. وتبعدك عن طريقهم .. مش طايقينك .. مش مستحملينك .. مش عايزينك

اسوأ حاجة لما تحس دا مع حد انت بجد حبيته ..  ومن غير ارادة منك بقيت شايفه وطنك .. وسكنك .. وحتة منك زى ما يكون ابنك اللي من لحمك ودمك.. والانسان الوحيد اللى ممكن تجرى تعيط قدامه .. وتحكيله عن اى حاجة حتى لو كانت مشينة بالنسبة لك .. من غير ماتكسف منه .. ولاتحط فى اعتبارك انه ممكن يستصغرك او تقل من نظره .. اسوأ حاجة انه يبقى اكتر واحدة بيبعدك .. وبيزقك بمنتهى القسوة ..  اسوأ حاجة انه يبقى هو كمان مش قابلك .. ومش حبك .. ومش فاهمك 

والأسوأ من دا كله لما تحس ان انت السبب فى كل حاجة وحشة بتحصلك .. انت السبب فى معاملة الناس ليك اللى مش عجباك .. انت السبب بقرارتك الغلط .. بافكارك الغلط .. بثقتك الغلط اللى بتحطها فى الناس .. بمشاعرك اللى بتطلعها فى المكان الغلط .. لما تحس ان انت اللى واقف فى طريق نفسك .. انت اللى سادد سكة نفسك .. انت اللى جايب لنفسك الكلام

2 comments:

شمس النهار said...

ساعتها بتحس بعبارة
((انا مش عارفني ))
دي صح اوي

Hesham said...

عارفة ياصديقتى لو راجعتى مدونتى عام 2009 حتلاقينى كاتب قصيدة اسمها ثمن الغربة بتقول نفس اللى انتى كاتباه ولكن فى صورة شعرية عاطفية وطنية