Tuesday, July 26, 2011

حلوة يابلدى .. بس !!!



لما كنت اسمع كلمات زى احنا شعب ميستاهلش .. او احنا شعب اصلا مش كويس .. او احنا شعب عاوز اللى يديله على دماغه . كنت استغرب اوى

دلوقتى فهمت معني الكلام دا .. احنا فعلا شعب مش كويس .. طبعا مش كلنا .. فينا ناس محترمة جدا .. وجادة جدا .. ومتحضرة جدا .. وعارفة مصلحتها جدا .. بس برده فينا عادات كتير وحشة .. وحتى الكويس فينا فيه حاجات وحشة برده .. وحاجة وحشة جنب حاجة تانية جنب تالتة تعمل فينا تمانين مليون حاجة وحشة

لسه فينا ناس مش عاوزة تشتغل .. مش عاوزة تتعب .. مش عاوزة تصبر عشان توصل للحاجة الى هيا عاوزاها
لسه فينا ناس مش بتحب الخير لبعض وكل هدفها تعطل اى حد ينجح .. وتدايق اى حد مبسوط وتقف عقبة فى طريق اى حاجة كويسة
لسه فينا ناس مش بيعجبها العجب وكل ما تتحط فى حاجة تحاول تبوظها عشان تبين ان رأيها صح من الاول 
لسه فيه ناس معندهاش تحضر .. ولا احترام الاخر .. ولا احترام النفس 
وناس متعصبة وناس بتجرى ورا مصلحتها بس بغض النظر عن مصلحة البلد كلها 
وناس عندها استعداد تبقى بلطجية عشان خمسين جنيه 
وناس مش عاوزة تلتزم باى قوانين ولا قواعد عشان مصلحتها الشخصية 

احنا اللى بندى عن نفسنا الصور دى .. احنا اللى عملنا لنفسنا تصنيف لوحدنا بين كل الشعوب .. وخليناهم يعرفوا بره اننا مبنحترمش المواعيد مثلا .. وكسولين ومش بتوع شغل جد 

للاسف الوحش بيطغى على الحلو .. والصورة مهما كانت حلوة اى رتوش بتشوها .. 

ساعات بحس اننا منستاهلش بلدنا من كتر محنا مشوهنها ومبوظين صورتها .. وللاسف السلوكيات الغلط اللى فى حياتنا بتقضي على احلامنا وعلى طموحنا .. لان ما كل ماتت ضماير ناس بتموت معاها احلام ناس تانية .. وبتقف عقبة فى طريق اى حد بيحاول يبنى .. وبتبقى شوكة فى ضهر اى حد تاعب نفسه عشانا وشايل همنا 

انا بحب بلدى جدا وبحب ناسها جدا .. وبحاول مع كل سلوك وحش يقابلنى ألتمس له العذر .. بس ساعات فعلا بحزن وبزعل من جوايا بجد كل ما اشوف سلوكيات غلط بتبعدنا عن بعض .. وبتضر مصلحتنا ومصلحة البلد دى 

ياريت : كلنا نفوق بجد ونخاف على مصلحة بلدنا وبلاش التهور والتسرع والحماس الزايد  .. ياريت نخاف على بعض ونحكم ضمايرنا فى كل حاجة بنعملها .. ومنسمحش ومنديش فرصة لحد يقول اننا شعب عوج ويلزمنا فرعون عشان يحكمنا .. لاننا بجد مش كده